%20en%20Threads3.png){kind=small}
Grazas á colaboración subscrita con FESBAL, todas as persoas que participen nas
actividades da Obra Social de ABANCA poderán depositar as súas doazóns nos
contedores destinados a este fin
28.09.2021. Afundación, a Obra Social de ABANCA, no marco do seu fomento de
propostas de acción social, poñerá en marcha a partir deste mes de setembro e ao
longo do próximo ano 2022, un ambicioso programa no que os eventos culturais
desenvolvidos nos centros da entidade, e tamén naqueles espazos nos que se leven a
cabo actividades de Afundación, animen á solidariedade. Mediante a colaboración cos
Bancos de Alimentos locais, nas sedes da Obra Social de ABANCA habilitaranse, de
modo gradual, contedores que servirán como puntos de recollida dos alimentos que os
visitantes das iniciativas culturais de Afundación queiran doar. Así, «Cultura por
alimentos», apela á participación da cidadanía e responde ao chamamento solidario
dos Bancos de Alimentos e dará comezo o próximo 30 de setembro, co gallo da
inauguración da mostra na Sede Afundación Vigo de «This is pop. Das latas de Andy
Warhol ás túas». Ao acto de presentación de «Cultura por alimentos», que tivo lugar
esta mañá ás 10.00 h na Sede Afundación A Coruña, asistiron Miguel Ángel Escotet,
presidente de Afundación; e Gregorio Pérez, tesoureiro de FESBAL. Estiveron tamén
Pedro Otero, director xerente de Afundación; M.ª Teresa Cores, coordinadora de
Cultura de Afundación; e Concepción Rey Pedreira, presidenta do Banco de Alimentos
Rías Altas.
O presidente de Afundación, Miguel Ángel Escotet, describiu a motivación da entidade
por poñer en marcha este programa, xa que «Afundación, como Obra Social de ABANCA e entidade socialmente responsable e comprometida co seu contorno, cuxa
acción estratéxica se centra nas persoas, non pode deixar de facerse eco e actuar ante
as devastadoras cifras do aumento da pobreza e reclama o compromiso de todos os
beneficiarios das súas actividades e servizos culturais para a causa de destinar
alimentos ás persoas máis vulnerables». Ademais, destaca que «é un programa
notable que non só ofrece respostas ás situacións de fame e falta de alimentos en
persoas vulnerables, senón que é un proxecto transversal que recolle, ademais, na súa
misión e filosofía importantes liñas estratéxicas de Afundación como son: a acción
social co obxectivo posto en persoas vulnerables; a cultura como motor do
crecemento das persoas; o voluntariado, porque serán voluntarias e voluntarios quen
xestionen a organización e envío dos alimentos a FESBAL en contedores; e a educación
en valores, pois promove a solidariedade entre as persoas e sensibiliza á poboación na
fraternidade entre iguais».
Pola súa parte, Gregorio Pérez, tesoureiro de FESBAL resaltou que «desde a federación
agradecemos a Afundación a posta en marcha dun proxecto que é, sen dúbida, un
aliciente para que os bancos de alimentos galegos sigan atendendo os máis de 65 000
beneficiarios anuais, dos que 12 000 son nenos. A solidariedade deste pobo é ben
loable, xa que, as diferentes campañas que impulsamos no panorama nacional, foron
excepcionalmente ben acollidas en Galicia. O certo é que nos diriximos a un segmento
de poboación crítico, os maiores de 50 anos expulsados do mercado laboral e toda
axuda é fundamental. Este programa para min ten tres campos moi interesantes:
apoiar os colectivos máis vulnerables no escenario actual, que é imprevisible; propiciar
a solidariedade e sensibilizar os usuarios; e intentar a formación da xente nova, crear
inquietude. Este valor holístico é esencial nun programa coma este».
Esta iniciativa de contribuír cun alimento con motivo da participación nos eventos
gratuítos de Afundación, estenderase, tamén, a outras actividades con entrada, nas
que o pago será unha equivalencia en forma de alimentos. Así, na Coruña coa serie de
concertos de «Butaca de jazz», a entrada será a doazón do equivalente do prezo do
pase en comida non perecedoira. Nesta ocasión, e para seguir garantindo o
cumprimento da capacidade establecida, poderán realizar as reservas a través de Ataquilla.com. De maneira gradual, iranse sumando todos os centros e sedes de
Afundación, desde os de carácter sociocultural, ata os educativos e lúdico-formativos,
desde IESIDE, ata as bibliotecas e espazos +60.
Este programa complementarase cunha serie de accións de visibilización para
favorecer a interacción do público e conseguir, deste modo, un impacto solidario de
envergadura coa cultura como pano de fondo. De feito, os recipientes destinados para
a recolección das doazóns son as propias caixas de madeira nas que se transportan as
obras de arte, habilitadas para a ocasión.
As efemérides destacadas, como as conmemoracións do libro, o medio ambiente ou a
infancia, contarán tamén con propostas de intercambio específicos. Así, máis de mil
exemplares das obras publicadas por Afundación poderán ser adquiridos a cambio da
doazón de alimentos. De igual maneira, Naturnova realizará actividades concretas
baixo estas mesmas premisas.
