A nova infraestrutura está formulada de tal forma que lle permitirá ás
persoas usuarias continuar o seu percorrido pola senda Mesoiro-Camiño
de Campos, en dirección a Feáns
A Coruña, 13 de decembro de 2023.- O Concello da Coruña aprobou a saída a licitación das
obras de construción correspondentes ao novo treito de carril bici de Novo Mesoiro, o
primeiro que se habilitará no barrio, e que estará comprendido entre as dúas rotondas
conectadas pola rúa Illas Sisargas.
Está previsto que esta nova infraestrutura se execute no treito de Illas Sisargas en sentido
de saída cara á rotonda de confluencia coa estrada DP-0512. Para a súa construción será
preciso reordenar os espazos existentes na vía, xa que o carril bici —bidireccional e cun
mínimo de 2,50 metros de ancho—, discorrerá sobre as áreas de estacionamento en batería
existentes na actualidade, que se substituirán por aparcadoiros en liña.
A este respecto, e como xa é habitual noutros treitos de carril bici distribuídos pola cidade,
haberá cores e pavimentos diferenciados en función do sector de circulación das bicicletas:
nas zonas onde o estacionamento pasará a estar en liña, mantense o pavimento de lastros
de formigón xa existente; e haberá un reforzo de formigón, coloreado en vermello, en
paralelo aos percorridos peonís e paradas de autobús. Todo isto, co obxectivo de reforzar a
seguridade das persoas usuarias.
Este primeiro treito de carril bici a implantar no barrio coruñés está formulado de tal forma
que lle permitirá ás persoas usuarias continuar o seu percorrido pola senda Mesoiro-Camiño
de Campos, en dirección a Feáns.
Unha vez que se adxudiquen os traballos —cun orzamento base de licitación de 138.021
euros—, o prazo de execución das obras correspondentes á primeira fase do novo treito de
carril bici en Novo Mesoiro estímase en catro meses.
O novo percorrido crearase na contorna da estación de BiciCoruña
No pasado mes de xuño, o Goberno de Inés Rey puxo en marcha a primeira base do
servizo municipal BiciCoruña na rúa Illas Sisargas, próxima á rotonda que conecta coa
avenida Novo Mesoiro e as rúas Illas Cíes e Laxe. Conta con 23 ancoradoiros, con
cadansúas bases de carga para os vehículos.
Neste sentido, este primer treito de carril bici previsto no barrio estará lindeiro á propia
estación, aproveitando as infraestruturas xa construídas entre maio e xuño.
Redución a tres carrís de circulación no sector inferior de Illas Sisargas
A construción do novo treito de carril bici en Illas Sisargas tamén suporá a remodelación do
sector leste da rúa, o máis próximo á rotonda que conecta coa DP-0512. Neste punto, a
creación do percorrido ciclista lindeiro á beirarrúa sur, onde xa non hai áreas de
estacionamento e se incrementan os espazos de paso peonil, implicará a redución a tres
carrís no referente ao tráfico rodado —haberá dous carrís de circulación en sentido de saída
cara a rotonda, e un en sentido de entrada—.
Esta disposición manterase unicamente no primeiro terzo da rúa Illas Sisargas, o máis
alonxado do barrio. Xa no percorrido restante volverá a haber catro carrís de circulación —
dous carrís de circulación en sentido de saída cara a rotonda, e outros dous en sentido de
entrada ao barrio—.
Renovación dos accesos e pasos peonís
En paralelo á construción do carril bici, o Concello ten previsto remodelar os accesos e
pasos peonís correspondentes á rede ciclista. Neste sentido, nas zonas de cruzamento coa
calzada disporanse resinas de cor vermella sobre o pavimento de mestura bituminosa.
Ademais, tamén se prevé acometer melloras nas beirarrúas, onde se disporán lousas
podotáctiles nos accesos aos pasos peonís, en relevo, para facilitar a orientación das
persoas invidentes.
Neste sentido, o Goberno de Inés Rey tamén está a valorar a elevación do paso peonil
existente no sector central de Illas Sisargas, fronte a dous dos grandes establecementos
comerciais da contorna, co obxectivo de reforzar a seguridade peonil neste treito do barrio.
%20en%20Threads3.png){kind=small}
%20Instagram.png)
