Sada aumentou un 47% a súa actividade deportiva durante o pasado ano

- A concellería de Deportes organizou ou colaborou en 101 eventos deportivos no 2019 convertendo ao municipio nun dos máis activos na práctica deportiva na área metropolitana.

- Os resultados indican un 47% máis de participación, colaboración ou programación de eventos deportivos con respecto ao 2018, polo que prosegue a tendencia á alza iniciada hai uns anos e que en 2018 xa supuxo un aumento do 38% con respecto ao 2017.

Sada, 14 xaneiro 2020. A concellería de Educación e Deportes, xestionada por María Nogareda, deu a coñecer esta mañá os resultados das actividades deportivas nas que a área de deportes participou ben organizando ou colaborando activamente.

Campionatos de varias categorías en disciplinas como patinaxe, salvamento deportivo ou fútbol praia; torneos de baloncesto, xadrez, ximnasia artística, judo ou dominó; travesías a nado, dual cros, maratóns de fútbol sala, carreiras nocturnas, campus deportivos en varias disciplinas, regatas de vela, festas fin de tempada, exhibición de deportes minoritarios ou carreiras atléticas de todo tipo, sumaron un total de 101 eventos durante o pasado ano no municipio sadense.

A concellaría de Deportes realizou balance da pasada tempada arroxando un resultado dun 47% máis de participación, colaboración ou programación de eventos deportivos con respecto ao 2018. Estes datos continúan a tendencia de crecemento de práctica deportiva do Concello de Sada que xa no ano 2018 aumentou un 38% a súa programación de actividades con respecto ao 2017, cando xestionaba a área Zeltia García quen tamén estivo ao mando da concellería até o mes de maio do 2019.

María Nogareda valora moi positivamente estes datos. “Gran parte da culpa destes datos téñena os clubs deportivos de Sada que están a realizar un labor inmenso para potenciar a práctica de diferentes disciplinas deportivas, sinala Nogareda, quen engade que este espectacular aumento obedece tamén á incorporación de novos clubs durante os últimos anos así como ao aumento do investimento en material da área que lle leva a poder colaborar máis activamente coas entidades.

Sada ten rexistradas vinte e oito entidades estritamente vinculadas á actividade física, que son capaces de mover de maneira regular a máis de 3.000 deportistas entre federados e non federados e que contan case con 5.300 socios, segundo os datos dos que dispón o Rexistro Municipal de Asociacións, unha cantidade nada desdeñable para unha poboación de preto de 16.000 habitantes.

Estas cifras, xunto coa cantidade de eventos que a concellaría de deportes programa ou colabora ao longo do ano converten ao Concello de Sada nun dos máis activos na práctica deportiva da área metropolitana. As cifras destacan e máis se se ten en conta que non se contabilizan as persoas que optan polas escolas deportivas municipais, as usuarias da piscina, das pistas polideportivas, dos ximnasios privados ou os que adestran de maneira independente sen a cobertura dunha entidade.