%20en%20Threads3.png){kind=small}
Os traballos abranguen a reforma completa do cruzamento coas rúas Tren e
Disciplina. Ademais, plantaranse 14 árbores co obxectivo de gañar espazos
verdes na contorna
A Coruña, 17 de marzo de 2022.- O Concello da Coruña acomete, desde este xoves, a
reurbanización da travesía da Torre, no barrio de Monte Alto, unha obra que procura garantir
a accesibilidade universal dos seus percorridos peonís.
O proxecto inclúe a reordenación deste ámbito dispoñendo unha plataforma única que
diferenciará as zonas para peóns e de tráfico rodado con distintos firmes. Ademais,
plantaranse 14 árbores, dentro da estratexia do Goberno de Inés Rey de expansión de
zonas verdes e arboredo nos espazos urbanos.
A intervención na travesía, que comezou esta mañá coa pertinente sinalización da área a
reurbanizar, chegará tamén ás conexións coas rúas Tren e Disciplina, onde se reformarán
os cruzamentos para aumentar os espazos peonís, co obxectivo de evitar o estacionamento
indebido que se realiza neses puntos. Ademais, a disposición de arboredo prevista polo
servizo de Infraestruturas do Concello tamén chegará aos cruzamentos da travesía da Torre
coas rúas Tren, Disciplina e Xustiza.
As alternativas e percorridos dispostos para o tráfico durante o inicio dos traballos
O servizo municipal de Mobilidade prevé alteracións no tráfico na travesía da Torre e os
cruzamentos coas rúas Tren e Disciplina ata as 18.30 horas do vindeiro día 17 de abril, co
corte total deste punto para levar a cabo tarefas de pavimentación integral e novas redes de
saneamento.
Neste sentido, facilitaranse alternativas para o tráfico no acceso á travesía da Torre pola rúa
Xustiza, así como un acceso á rúa Alcalde Folla Yordi desde a rúa Tren, pasando pola rúa
Campo de Artillería. Baseándose nisto, executarase un cambio da dirección do tráfico en
Campo de Artillería para dar saída aos vehículos que acceden desde a rúa Tren, así como
unha modificación da dirección do tráfico na rúa Xustiza, desde a rúa Traballo, ata a
travesía da Torre.
