%20en%20Threads3.png){kind=small}
‘Celtas Cortos’ actuarán ás 00.15 horas da noite de San Xoán na explanada
de Riazor
A Coruña, 16 de xuño de 2023.- Arranca a programación do San Xoán 2023 con oito días
de actividades gratuítas para todos os públicos que se distribuirán polos diferentes barrios
da cidade. A alcaldesa, Inés Rey, presentou esta mañá a programación cultural con motivo
da celebración da noite meiga e que comeza esta mesma tarde con actividades nos Xardíns
de Méndez Núñez.
A actuación central deste San Xoán 2023 será o concerto de ‘Celtas Cortos’ na explanada
do Palacio dos Deportes de Riazor. O mítico grupo de rock fará unha parada na súa xira
nacional para poñer a nota musical á noite coruñesa do San Xoán, interpretando os seus
temas máis coñecidos como '20 de abril' ou 'Cuéntame un cuento'. Subirán ao escenario ás
00.15 horas, tras a sesión de fogos de artificio e a queima da falla. Antes, ás 22.15 horas,
actuará o grupo ‘The Txandals’ para animar a xornada antes de que se prendan.
Inés Rey explicou que se trata dunha programación “ampla e aberta a todos os públicos e
que terá tamén presenza en todos os barrios”. Dende hoxe ata o venres 23 de xuño
celebraránse actividades de balde para os máis cativos e cativas, como obradoiros de
decoración de sardiñas, concertos infantís ou funcións teatrais variadas en diferentes
puntos da cidade. En caso de chuvia, haberá lugares alternativos a cuberto.
Por outra banda, a fin de semana do sábado 17 e domingo 18 de xuño realizarase no
parque de Santa Margarida a tradicional Romaría da man de Xacarandaina. O sábado ás
18.00 haberá unha foliada infantil á que lle seguirá ás 21.30 horas o concerto de
Lagharteiras. A partir das 22.30 horas, comezará a foliada para persoas adultas que contará
con diferentes grupos tradicionais. O domingo pecharase a romaría a partir das 12.00 horas
coas actuacións dos distintos grupos da agrupación Xacarandaina.
Como é tradición, o sábado 17 tamén se fará a tradicional sardiñada popular que
acompañará á Romaría de Xacarandaina. O horario será de 19.00 a 23.00 horas e o prezo
por prato de sardiñas é dun euro con pan e auga ou viño.
O xoves 22 a Asociación Cultural Donaire ofrecerá unha ruada, que irá desde o Obelisco a
María Pita a partir das 19.00 horas. Ese mesmo día, a Banda de Música Municipal actuará
en San Andrés co programa ‘Músicas de Ballet, a partir das 20.00 horas. A Banda estará
dirixida por Juan Miguel Romero Llopis.
O xoves 23 de xuño, nas horas previas á noite de San Xoán, tamén haberá varias
actividades. Durante a mañá, desde as 11.00 horas, no Campo da Leña haberá obradoiros
de decoración de sardiñas e herbas de San Xoán, actuacións teatrais e o concerto de Pablo
Díaz Trío ás 13.00 horas. A queima da falla será ás 00.00 horas logo da tirada de fogos de
artificio, que será ás 23.50 horas. O concerto de Celtas Cortos pechará a programación
cultural deste San Xoán.
Pautas de seguridade
A alcaldesa deu conta das diferentes pautas de seguridade a cumplir con motivo da
celebración de San Xoán. No canto das sardiñadas, churrascadas e similares trasladou que
durante a noite de San Xoán (do 23 a o 24 de xuño) están permitidas, sen necesidade de
comunicación, as sardiñadas e churrascadas en espazo público que non ocupen calzadas
nin entorpezan a circulación de vehículos. Deberanse realizar entre as 13.00 e as 16.00
horas e entre as 20.00 e as 00. horas e cumprir coas medidas de seguridade. As beirarrúas
deberán quedar libres para permitir o tránsito peonil e o lume conservarase en pequenas
dimensións, de forma que poida ser controlado en todo momento. O resto deben realizar
unha comunicación previa por escrito á Área de Seguridade Cidadá, cunha antelación
mínima de 48 horas da realización da actividade. Na web de Seguridade Cidadá está toda a
información. Será obrigatorio limpar o espazo autorizado despois de que remate a
actividade.
No canto das fogueiras, na noite de San Xoán autorízase realizar lumeiradas en espazos de
titularidade pública. Para isto, será preciso que as persoas interesadas presenten unha
comunicación previa por escrito á Área de Seguridade Cidadá de forma presencial ou
online. Toda a información está na páxina web de Seguridade Cidadá.
O horario para baixar o material para as fogueiras das praias da cidade será a partir das
19.30 h do día 23 de xuño. O reparto de madeira a pé de praia producirase ás 19.00 horas e
repartiranse 120 toneladas de madeira para uso público. As fogueiras non poderán ter una
altura superior á que determinen os servizos de urxencias e seguridade municipais que as
inspeccionen, e que en todo caso estará en función da súa localización, das distancias aos
edificios e a outros elementos da contorna.
Por motivos de seguridade, as fogueiras só se poderán acender protexendo o chan cunha
capa de area mínima de 10 cm de espesor ou materiais semellantes. Non se poderán
realizar fogueiras preto de colectores de toda clase de residuos, vehículos, vivendas etc.
(deberán manter sempre unha separación mínima de 5 metros). Non está permitido o uso
de combustibles líquidos nin de acelerantes. Así mesmo, está prohibido queimar plásticos,
cauchos, rodas, colchóns, madeira lacada, gomaespuma e outros obxectos que poidan
producir gases tóxicos, especialmente na praia, onde tampouco se queimarán mobles nin
obxectos voluminosos e madeiras que leven puntas ou cravos.
Nas zonas de exclusión non se poderá prender lume de ningún tipo. Son zonas de
exclusión onde non está permitido facer lume: a totalidade do trazado do oleoduto e
gaseoducto de alta presión, o Parque de Bens incluíndo a praia de Bens, o Monte de San
Pedro, os Xardíns de Méndez Núñez, os Xardíns de San Carlos, a praza das Bárbaras e a
contorna da Torre de Hércules, incluído o merendeiro das Lapas, a praia das Lapas e as
calas dos Moros e de Durmideiras, sen prexuízo de que os servizos de Seguridade poidan
designar algunha outra zona baseándose en criterios de protección das persoas e os bens
públicos.
A alcaldesa fixo un chamamento ao civismo e á responsabilidade, especialmente no relativo
á reciclaxe. Explicou que está prohibido trasladar colectores de residuos e cambiar a súa
localización debido aos desaxustes que isto causa na recollida de lixo durante os días
posteriores ao San Xoán. “Tampouco está permitido baixar con vidro ás praias e os residuos
depositaránse nas zonas de recollida habilitadas para tal fin nos accesos ao areal” sinalou.
En relación ás praias, a alcaldesa explicou que o día 23 de xuño se pechará a circulación no
Paseo Marítimo, na zona das praias de Riazor, Orzán e Matadoiro desde as 19.00 h. O
baño nas praias da cidade estará prohibido desde as 22.00 h do día 23 de xuño até as 9.00
horas do día 24 de xuño. Os servizos de seguridade e urxencias restablecerán o tráfico
segundo evolucionen as previsións dos ditos servizos.
Con carácter xeral, o Concello autoriza a ampliación do horario dos establecementos de
ocio e hostalería en dúas horas, autorización que deberá solicitarse expresamente.
Dispositivo especial de seguridade
Este ano, o Concello da Coruña contará cun dispositivo oficial de seguridade cun total de
656 efectivos entre servizos de seguridade e urxencias municipais. O Centro de Mando
Móbil volverá estar instalado na Coiraza e o dispositivo comezará oficialmente ás 05.30
horas do día 23 de xuño. O dispositivo funcionará a pleno rendemento ata as 06.00 horas
do 24 de xuño, cando se desaloxarán as praias para a súa limpeza. “Pregamos
colaboración cidadá para que ás 6.00 h do 24 de xuño as praias estean libres e que o
servizo de limpeza poida levar a cabo as actuacións necesarias para habilitar a praia para o
seu uso” sinalou Rey. Este ano a vixilancia reforzarase por primeira vez co uso dos dous
novos drons da Policía Local.
Manteranse as localizacións dos servizos de anos anteriores, como o posto médico
avanzado da Cruz Vermella ou as cámaras de vixilancia dispostas ao longo do paseo
marítimo. Ademais, haberá nas praias un servizo especial de salvamento e socorrismo, que
disporá de dúas embarcacións para emerxencias. Tamén haberá vixiantes de seguridade
nos accesos ás praias de Riazor, Orzán, As Lapas e en Punta Herminia, nestes dous
últimos espazos para evitar a entrada de persoas, xa que están prohibidas as cacharelas
para salvagardar o patrimonio da contorna.
Transporte público
Establecerase un dispositivo especial de transporte público que consiste na posta a
disposición de oito liñas especiais que comunicarán os barrios coa praza de Pontevedra.
Terán cada unha delas unha frecuencia de 10 minutos ata as 02.30 horas.
O servizo nocturno estará operativo entre as 03.00 e as 06.30 horas cunha frecuencia de 30
minutos. Os tempos son aproximados e poderían variar en función do tráfico.
As liñas que estarán dispoñibles durante a noite de San Xoán serán: 1, 1A, 3, 6, 7, 11, 21 e
unha circular entre a Cidade Vella e Monte Alto (3A). Ademais, o servizo nocturno, con
saídas cada media hora, seguirá o seu itinerario habitual. O obxectivo é conectar todos os
barrios da cidade coa praza de Pontevedra e permitir un desprazamento cómodo e seguro
da cidadanía.
Puntos violeta
O Concello da Coruña habilitará catro puntos violeta no Paseo Marítimo. Un deles será fixo,
na zona das Escravas, e como novidade disporemos de tres puntos violeta móbiles que
rondarán o Paseo Marítimo, desprazándose polo espazo no que se celebre a festa. Un dos
puntos móbiles quedarase como referencia fronte ao Palacio dos Deportes de Riazor
durante a celebración dos concertos na explanada. O horario de atención será das 22.00
horas do 23 de xuño ás 05.00 horas do 24 de xuño, aumentando unha hora máis o servizo
con respecto ao ano pasado.
Trátase de espazos seguros que lle ofrecen información á cidadanía en xeral e
asesoramento e atención psicolóxica ás adolescentes e mulleres en materia de violencia
machista, sobre todo aquelas relacionadas coa violencia sexual. A alcaldesa lembrou que
esta foi unha medida pioneira neste primeiro mandato. “Por primeira vez puxéronse a
disposición como puntos de atención e non só de información co obxectivo de dar unha
resposta máis rápida ante posibles casos de violencia machista” explicou a alcaldesa. Con
esta medida o Concello da Coruña contribuirá a favorecer o goce da Festa de San Xoán en
condicións de Igualdade.
Programación cultural do San Xoán 2023
VENRES 16
Xardíns de Méndez Núñez (En caso de choiva, no Centro Cívico da Cidade Vella)
18.00 h - Tigre de papel / Obradoiro de decoración de sardiñas
19.00 h - Peter Punk e Brais das Hortas / Concerto punk infantil
SÁBADO 17
Parque de Santa Margarida
18.00 h - Foliada infantil con Xacarandaina, Son D’Aquí e grupo San Pedro de Nós
De 19.00 a 23.00 h - Sardiñada popular / Prezo: 1 € con pan, auga ou viño
21.30 h - Concerto Lagharteiras
22.30 h - Foliada cos grupos de Xacarandaina, Donaire, Santaia de Santa Cruz, Abaladeiras de Muxía,
Santiaguiños de Boimorto, Cantigas e Agarimos de Santiago, Arume de Caión, Alxibeira de Narón e
Carcaxía de Malpica
Praza Elíptica (En caso de choiva, no Eentro Cívico dos Rosais)
19.00 h - Danthea teatro / A carapuchiña vermella
Praza de Vigo (En caso de choiva, nas cúpulas acristaladas da praza)
19.00 h - Pakolas / Rockeando coa Ramona
Praza de Tabacos (En caso de choiva, no Fórum Metropolitano)
19.30 h - Caramuxo Teatro / Pavillón lino
DOMINGO 18
Parque de Santa Margarida
12.00 h - Romaría do lecer / Clausura de actividades de Xacarandaina con todos os seus grupos de
baile e música
Praza dos Avós (En caso de choiva, no Centro Cívico de Montealto)
19.00 h - Ghazafelhos Teatro / As minas do Rei Salomón
Praza das Bárbaras (En caso de choiva, no Centro Cívico da Cidade Vella)
19.00 h - Náufragos / Hugo
Praza do Humor (En caso de choiva, nos soportais do Palacio Municipal de María Pita)
19.30 h - Xampatito pato / Só
LUNS 19
Praza dos Mariñeiros (En caso de choiva, no Centro Ágora)
19.00 h - Elefante elegante / Cubo
Praza Pablo Iglesias (En caso de choiva, Centro Cívico do Castrillón)
19.00 h - Pedras de cartón / Quixote
Praza da Tolerancia (En caso de choiva, no Centro Cívico de Labañou)
19.30 h - Baobab Teatro / Puño puñete
MARTES 20
Parque de Santa Margarida, escaleira da Casa das Ciencias
19.00 h - Os contos de Pablísimo / Coabicivai
Praza de Azcárraga (En caso de choiva, no Centro Cívico da Cidade Vella)
19.00 h - Caxoto e Marc Taeguer / Contos debuxados, debuxos contados
Praza de Pontevedra (En caso de choiva, na Biblioteca Durán Loriga)
19.30 h - Medhi Beduin / Maurice
MÉRCORES 21
Centro Cívico de Novo Mesoiro
19.00 h - Títeres Mircromina – Raio de Loubicán
Cúpula de Eirís
19.00 h - Sempre arriba! – C ́est pas possible
Rúa Gaiteira (En caso de choiva, no Fórum Metropolitano)
19.30 h - Paco Nogueiras / Canto Contigo
XOVES 22
Centro Cívico de Palavea
19.00 h - A maga Fani e Martín Camiña / Antoloxía de despropósitos
Parque de Oza (En caso de choiva, no Centro Cívico de Monelos)
19.00 h - Artestudio teatro / Avó
Do Obelisco á Praza de María Pita
19.00 h - Ruada da Asociacion Cultural Donaire
Parque de Vioño (En caso de choiva, Centro Cívico da Sagrada Familia)
19.30 h - Pérez&Fernández / Picnic
Praza de San Andrés
20.00 h - Concerto da Banda Municipal de Música da Coruña
VENRES 23
Campo da Leña (En caso de chuvia, Centro Cívico da Cidade Vella)
11.00 h - Tigre de papel / Obradoiro de decoración de sardiñas
11.00 h - Taller de herbas de San Xoán
13.00 h - Actuación de Pablo Díaz Trío
17.00 h - Compañía Mar Rojo Teatro - A biblioteca de eme
18.00 h - Inventi teatro - A tropa do Doutor Milagre
Praia de Riazor
19.00 h - Fogueiras de San Xoán
22.15 h - Concerto de The Txandals
23.50 h - Espectáculo de fogos de artificio
00.00 h - Queima da falla
00.15 h - Concerto de Celtas Cortos
