BREO, o grupo revelación do folk en Galicia, estreará o 9 de outubro o seu primeiro disco ‘Máis Alá’

Estarán na Sala Garufa Club o 12 de outubro

BREO, o novo grupo revelación do folk en Galicia, presentará o seu primeiro traballo discográfico, ‘Máis Alá’, o mércores 9 de outubro, que se poderá escoitar en todas as prataformas dixitais.

‘Máis Alá’ contén dez temas baseados na relevancia do misticismo, os costumes e as lendas galegas, que dan inspiración a cada unha das cancións que compoñen o seu primeiro álbum.

Para este traballo, gravado en Estudios Bruar, a nova formación galega contou con diferentes colaboracións musicais, como o cantante Sabu l’Aviseu (en ‘Canto Raibas’), Marta Chello (en ‘María ‘A Meiga’) e a banda da A. C. Triskell de Arteixo (en ‘Os Lombois’).

O nome do grupo está inspirado nunha deidade celta chamada ‘Berobreo’, gardián de almas e encargado de transportalas ‘ao máis ala’, o cal ten un santuario no alto do Monte do Facho (Donón, Cangas do Morrazo), unha das míticas finisterras atlánticas.

BREO está formado por Sandra Novais Meireles (voz, teclado e pandeireta), Samuel Lafuente Carballeda (violín), Rubén Gómez Castro (guitarras), Migui Ocampo (bodhran, percusións e programacións) e Bieito Romero Diéguez (frauta traveseira, acordeón diatónico e gaita).

A xira de presentación en Galicia ten datas confirmadas na Sala Garufa Club de A Coruña (12 de outubro) na Casa das Crechas en Santiago de Compostela (26 de outubro).