A entrada será libre e de balde ata completar a capacidade.
A mostra amplía os seus horarios durante o período de Nadal.
20.12.2019. Continúa o ciclo de cinema dedicado á Natureza organizado por Afundación, a Obra social de ABANCA, no marco do seu último proxecto expositivo, «O noso planeta», que se pode visitar actualmente na Sede Afundación da Coruña.
A seguinte proxección será o vindeiro luns 23 de decembro, a partir das 19.00 h, co filme Wall-E. A entrada é libre e de balde ata completar a capacidade e os filmes veranse en versión orixinal subtitulada ao castelán.
Wall-E (Andrew Stanton, 2008). No ano 2800, nun planeta Terra devastado e sen vida, tras centos de solitarios anos facendo aquilo para o que foi construído, limpar o planeta de lixo, o pequeno robot Wall-E descobre unha nova misión na súa vida cando se atopa cunha moderna e lustrosa robot exploradora chamada EVE. Ambos os dous viaxarán pola galaxia e vivirán unha emocionante e inesquecible aventura.
Todos os filmes que conforman o cartel deste ciclo foron recoñecidos con importantes galardóns internacionais. Tratan o tema do medio ambiente desde diferentes ópticas, como a relación do home co medio, o carácter redentor do encontro coa natureza ou a importancia de incorporar a sostibilidade e a protección do medio ambiente ao noso modo de vida. O último filme do ciclo serán A viaxe do emperador.
NOVOS HORARIOS DA MOSTRA
«O noso planeta» permanecerá aberta ata o próximo 8 de febreiro de 2020, con horarios ampliados durante o período do Nadal, entre o vindeiro luns 23 de decembro e o 6 de xaneiro, datas nas que abrirá de luns a sábado, en horario continuado de 11 a 21 h, excepto o 24 e 31 de decembro, que abrirá de 11 a 14 h, o 6 de xaneiro, de 12 a 21 h e o 25 de decembro e 1 de xaneiro, días nos que permanecerá pechada.
O 7 de xaneiro renovará as visitas para colectivos escolares e grupos previa reserva. Todos os mércores e venres, non festivos, realizarase un percorrido guiado ás 19.00 h de maneira gratuíta.
Estruturada en oito bloques, esta mostra incide na importancia do coidado e do respecto cara ao medio ambiente como única vía para unha vida sostible. A partir do documental que a plataforma audiovisual Netflix produciu para a televisión, e para o que conta coa locución de David Attenborough en inglés e de Penélope Cruz en castelán, e cuxa coordinación correu a cargo de Alastair Fothergill e Keith Scholey, Afundación, a Obra Social de ABANCA, e Planeta, editora do catálogo, presentan esta exposición en primicia mundial.
O compromiso de Afundación, a Obra Social de ABANCA, coa sostibilidade e o respecto ao medio ambiente motivou a realización desta mostra, xa que un dos principios fundamentais e transversais a toda a entidade reside, precisamente, en traballar consonte un modelo máis sostible que condense a aspiración a unha vida máis digna en todos os sentidos posibles. Deste xeito, Afundación e ABANCA son entidades comprometidas cos Obxectivos de Desenvolvemento Sostible da ONU e procuran, nos seus diversos ámbitos de actuación, divulgar o principio de sostibilidade como motor das actividades que se realizan.
