miércoles, 4 de marzo de 2020

Comunicado Oficial Rehabilitación Cemiterio Santo Amaro


A Coruña, 4 de marzo de 2020.- Co fin de aclarar as dúbidas surxidas pola veciñanza con respecto ás obras de rehabilitación na entrada do cemiterio de Santo Amaro e, en concreto, sobre os muros de cachotería de pedra, o concello informa que:

- Tras retirar destes muros o morteiro de cemento e despois de limpalos e sanealos, estanse a cubrir de novo con morteiro de cal xa que este tipo de material non se pode deixar á vista porque quedaría desprotexido ante os axentes erosivos do ambiente.

Asemade, ao non tratarse de pedra de cantería, a normativa urbanística municipal non permite deixalos á vista porque poden sufrir danos, sobre todo, por estar tan próximo o mar.

- Segundo os técnicos municipais é tradición nas cidades galegas calear os muros para protexelos e tecnicamente é unha solución correcta e válida. Neste caso, foi Patrimonio quen requeriu que se utilizase o morteiro de cal para este proxecto que aprobou a concellería de Emprego do anterior mandato dentro dun obradoiro que, por cuestións de tempo, non se rematou e que está a finalizar agora o servizo de Edificación, todo baixo a supervisión de Patrimonio da Xunta.