O (S8) empeza coas proxeccións desta 13ª edición con Ute Aurand como protagonista

 

30 de maio do 2022. - A programación do (S8) para mañá, martes 31 de maio, dará comezo coa posta en marcha de instalación Utitled (At Large), do artista Philipp Fleischmann, ás 18h00 en Palexco. Para a instalación, unha encomenda do MACRO (Museo de Arte Contemporánea de Roma), o dispositivo-cámara usado na filmación convértese en dispositivo de exhibición, mostrando a tira de celuloide xunta as súas imaxes proxectadas. O estado visual nunca está fixo, senón en fluxo constante. A instalación poderá visitarse tamén o mércores 1, o xoves 2, o venres 3 e o domingo 5 de xuño en horario de 12 a 14 horas e o sábado 4 de xuño en horario de 11 a 14 horas.   Ás 19h30 a Sala (S8) Porto acollerá as proxeccións do primeiro programa desta edición, arredor das obras da creadora Ute Aurand. A berlinesa eempezou a súa andaina como cineasta en 1980 despois de estudar na DFFB ( Deutsche Film und Fernsehakademie Berlin). É continuadora do legado de Jonas Mekas e Marie Menken, e unha das figuras máis prominentes a día de hoxe no ámbito do cinema diarístico e persoal. O foco que o festival lle dedicará recolle unha selección das súas películas desde o seu debut en 1980, obras que remiten á alegría do presente, o espírito colectivo e ás formas poéticas do cinema, que no seu caso se relacionan coas haikus xaponeses. A selección está composta por películas sempre en constante transformación que se proxectarán nos seus formatos analóxicos orixinais. Alén disto, a Mostra continúa coa súa programación online dispoñible en www.s8cinema.com ata o próximo 27 de xuño. Desta xeito, a programación presencial compleméntase con Ultreia et Suseia, un monográfico de cinema galego formado por entrevistas que o (S8) lles fixo en exclusiva a cineastas como Carla Andrade, Diana Toucedo, Helena Girón e Samuel Delgado, Xisela Franco, Tono Mejuto, Xiana do Teixeiro, Alexandre Cancelo e Berio Molina, e pensada para a súa promoción internacional, con subtítulos en galego, castelán e inglés.