%20en%20Threads3.png){kind=small}
.jpg)
Entre as actividades organizadas por KALANDRAKA figura a presenza dos ilustradores
Óscar Villán e Kiko Da Silva, que asinarán as súas obras, e un encontro co autor Fernando
Pérez Hernando arredor de «Chuvisca»
O autor e ilustrador coruñés David Pintor presentará o seu novo traballo, «Tartaruga vs.
Lebre, o desquite», mañá venres a partir das 19:30 horas na Feira do Libro da Coruña, onde
estará acompañado polo músico Paco Nogueiras. Trátase dunha divertida e transgresora
versión da coñecida fábula na que se descobre a verdadeira razón pola cal a tartaruga lle
gaña a carreira ao animal máis veloz do bosque.
Atribuída a Esopo e posteriormente reescrita por La Fontaine ou Samaniego, «A lebre e a
tartaruga» é unha historia que na que perseveranza é capaz de vencer a arrogancia. David
Pintor xoga con esta narración clásica, propoñendo un desenlace diferente. As ilustracións
expresivas e próximas á linguaxe visual do cómic acentúan o sentido do humor deste álbum
tan sorprendente.
Humorista gráfico, ilustrador e pintor, David Pintor ten recibido numerosos recoñecementos
ao longo da súa traxectoria: os premios Andersen 2015 (Italia) e Nami Island 2013 (Corea),
o premio da Society of News Design, o Pura e Dora Vázquez de ilustración, o Premio
Internacional Clermont-Ferrand de cadernos de viaxe, o Premio Ilustrador do Ano Città del
Sol e o 2o Premio da Feira do Libro de Sharjah (Dubai). Foi finalista dos CJ Picture Book
Awards (2011) e figura na lista The White Ravens (2009, 2011 e 2014). Foi seleccionado en
varias edicións da Bienal de Bratislava e da Feira Internacional de Boloña.
«CHUVISCA» CON FERNANDO PÉREZ HERNANDO
O autor e ilustrador vallisoletano Fernando Pérez Hernando tamén presentará o seu novo
libro, «Chuvisca», este martes día 8 a partir de las 17:30 horas. A actividade, dirixida a nenas
e nenos maiores de 3 anos, consistirá nunha sesión de contos a partir deste relato que
comeza cun ballón que empapa o fogar dunha familia de aves, cuxos protagonistas aprenden
os uns dos outros a partir desa experiencia.
«Chuvisca» tamén propón unha certa metáfora desta sociedade individualista que, dende a
solidariedade, a convivencia, a colectividade e a comunicación, pode mellorar. Fernando Pérez
Hernando converte as vogais nun recurso para xogar, estimulando a habilidade das lectoras e
dos lectores para descifrar palabras e resaltando a importancia destes cinco signos e sons para
artellar a nosa linguaxe. O autor crea un xogo fónico que asocia os cinco personaxes do libro
con cada unha destas letras.
Formado na Escola de Arte de Valladolid e graduado en Educación Primaria na Facultade de
Educación e Traballo Social da mesma cidade, Fernando Pérez Hernando especializouse en
álbum ilustrado e gravado. «Chuvisca», que foi finalista nos Premios A de Literatura Infantil
2023, é o seu segundo libro no catálogo de KALANDRAKA, logo de «A escada vermella».
SINATURAS
A participación de KALANDRAKA na Feira do Libro da Coruña continúa esta semana coa
presenza do artista Óscar Villán, ilustrador da colección de prelecturas «Do berce á lúa» e de
álbums tan senlleiros como «O coelliño branco» ou «A Cebra Camila», entre outros. Asinará
as súas obras na caseta da editorial este sábado dende as 19:00 horas.
Por último, o ilustrador e historietista Kiko Da Silva asinará exemplares de libros como
«Cando Martiño tivo ganas de mexar na Noite de Reis» e «Moncho e a mancha» o domingo a
partir das 12:30 horas na caseta da libraría Santos Ochoa.
