Maneiro presentará na Coruña o seu novo álbum, ‘Un bonito despertar’, o 17 de febreiro

O músico, tamén vocalista de Heredeiros da Crus, actuará no Playa Club ás 22.30 horas e as entradas están dispoñibles a través de www.enterticket.es

A Coruña, 7 de febreiro de 2024.- O cantante e compositor Javi Maneiro xira este mes de febreiro por teatros e salas de concertos de Galicia para dar a coñecer o seu cuarto álbum en solitario, Un bonito despertar. O Playa Club coruñés acollerá o sábado 17, a partir das 22.30 horas, o directo do músico, xa recuperado do accidente cerebrovascular que sufriu no 2022. As entradas están á venda desde 10€ a través de www.enterticket.es, mentres que na billeteira da sala de Riazor o prezo será de 15€.

Maneiro visita este inverno os teatros e salas de concertos de Galicia presentar o seu novo disco en solitario, no que asume tanto a autoría da música coma das letras. Logo do lanzamento de Un bonito despertar no mes de maio e da estrea ao vivo na Sala Capitol en xuño, o músico por fin levará o seu novo directo a un total de sete localidades do país grazas ao apoio da Xunta de Galicia. Sobre o escenario, o cantante acompañarase dunha banda conformada por Manu Rey (batería), Pachi Cruz (baixo), Rubén Cores (guitarra), Fernando Calvo (Guitarra) e Iria Iglesias (teclados).

Tras visitar Boiro e Ourense a pasada fin de semana, e logo dos días grandes do Entroido, Un bonito despertar presentarase no Playa Club de A Coruña o sábado 17. Ao día seguinte (domingo 18), Maneiro desprazarase a Lugo para actuar na Sala Jagger. Xa de cara á fin de semana seguinte, o músico estará no Master Club de Vigo (sábado 24) e no Centro Torrente Ballester de Ferrol (domingo 25). Finalmente, a xira pecharase o sábado 2 de marzo no Teatro Principal de Pontevedra. Os billetes para asistir aos concertos de presentación de Un bonito despertar pódense adquirir, desde 10 euros máis gastos de xestión, a través de www.enterticket.es (para os directos de A Coruña, Lugo e Vigo) e www.ataquilla.com (Pontevedra e Ferrol). 

Biografía Maneiro

Javi Maneiro é natural da Pobra do Caramiñal, mais reside en Ribeira desde hai 25 anos. Coñecido por ser vocalista de bandas como Heredeiros da Crus e Jabón Blue, no 2014 inicia a súa carreira en solitario, unha traxectoria que compaxinou co seu traballo nunha fábrica de conservas. No 2017 lanza o seu primeiro LP Furtivos e, dous anos despois, o segundo, Acaricia mis arrugas. A capacidade de composición de Maneiro é sorprendente: tan só un ano despois, no 2020, publica un disco acústico en formato videoálbum, Palabras de un desconocido. 

No 2021, para celebrar os seus 30 anos na música, comeza a traballar no que será o seu cuarto disco, Un bonito despertar; mais no medio da gravación do disco e da xira con Heredeiros, sufre un accidente cerebrovascular. Logo do seu lanzamento o pasado mes de maio, da presentación ao vivo na Sala Capitol de Santiago no mes de xuño e dunha coidada recuperación ao longo destes meses, Maneiro inicia en febreiro de 2024 unha xira de ateigada de vitalidade e entusiasmo polas salas de concertos e teatros de Galicia.

Xira de presentación Un bonito despertar

03.02.2024 Boiro | A Pousada da Galiza Imaxinaria, 22.00 horas
04.02.2024 Ourense | Teatro Principal, 20.00 horas
17.02.2024 A Coruña | Playa Club, 22.30 horas
18.02.2024 Lugo | Sala Jagger, 19.00 horas
24.02.2024 Vigo | Master Club, 22.30 horas
25.02.2024 Ferrol | Centro Torrente Ballester, 19.00 horas
02.03.2024 Pontevedra | Teatro Principal, 22.00 horas