miércoles, 30 de noviembre de 2022

A Radio Conta, 10 anos de solidariedade


O programa que une as radios coruñesas dedica a ADACECO a súa décima edición cun programa aberto ao público tras dous anos de pandemia

A Radio Conta cumpre 10 anos. A iniciativa que une oito radios públicas e privadas da Coruña chega á súa décima edición este 2022, e faino cun programa solidario dedicado a ADACECO, a Asociación de Dano Cerebral da Coruña.

Tras dous anos marcados polas restricións da pandemia, o programa recupera o formato presencial e estará aberto ao público. Deste xeito, a gravación terá lugar o mércores, 14 de decembro no Teatro Rosalía da Coruña, de 17h a 20h, con entrada libre. Posteriormente, as tres horas de radio emitiranse o sábado, 24 de decembro desde as 17h na frecuencia das emisoras implicadas.

A Radio Conta celebrará cun programa máis especial ca nunca os dez anos dunha acción coral que ten dous obxectivos, a solidariedade e a homenaxe á radio más próxima. Moncho Viña será o encargado de conducir unha redacción única que conforman arredor dunha trintena de profesionais de Radio Galega -que achega a cobertura técnica-, Radio Nacional de España, RadioVoz, Radio Intercoruña, Radio Coruña-Cadena Ser, Onda Cero, Radio Marca e COPE.

Nesta décima edición, pasarán polo Rosalía os cineastas Jorge e Pepe Coira xunto coa actriz Mabel Rivera. A música será tamén a protagonista coas actuacións de Merchy Treviño, Ortiga e Sés, ademais da presenza do barítono Borja Quiza e do multiintrumenstista Abraham Cupeiro.

Os xornalistas Luís Pousa e José Manuel Gutiérrez, o humor de Xosé Antonio Touriñán e o radioteatro a cargo do guionista Óscar Cruz completan o menú dun programa divertido, dinámico e inusual. Ao longo das tres horas de radio repasará os mellores momentos destes dez anos e mirará cara a outra efeméride: o 50 aniversario do Complexo Hospitalario Universitario da Coruña (CHUAC).

Neste 2022, A Radio Conta dará visibilidade a ADACECO, a Asociación de Dano Cerebral da Coruña. A entidade, con 22 anos de existencia, é a referencia na comarca da Coruña en atención ao dano cerebral adquirido (DCA). Actualmente, dá servizo a máis de 150 persoas e as súas familias grazas a profesionais con formación nas últimas tendencias en tratamentos.

Será a décima asociación coa que colabora A Radio Conta. A iniciativa solidaria naceu no 2013 cun primeiro programa especial dedicado á ONG Renacer. Desde entón, a radio da Coruña foi fiel á súa cita anual e axudou, nas sucesivas edicións, a Antonio Noche, Ecos do Sur, Agalure, Aspace, Asperga, Asanog, a loita contra a pandemia da COVID e Apem.

A entrada ao programa é libre e non é necesaria invitación. Haberá un posto de venda de material para axudar a ADACECO e deixar donativos. A iniciativa está aberta xa a colaboracións de particulares e empresas a través dunha fila cero:

ES45 2080 0000 7855 0046 4732 (ABANCA)